د. تماضر الحسن تكتب: نهاية كل اسبوع..

يوم الجمعة … برجع بيتنا بمود مختلف .. بكون سعيدة جدا اني ساعدت مرضاي والبشرف علي علاجهم
بكون فعلا سعيدة
لانو دا نهاية الاسبوع … ولانو دا يوم الكهرباء
ECT
Electroconvulsive therapy

التداوي بالصدمات الكهربائية

انا بشتغل في ايام الاسبوع الباقية في مكان .. ويوم الجمعة بكون عندي لستة عيانين مصابين بامراض نفسية مختلفة بتم علاجهم بالكهرباء …

بدير العيادة دي بنفسي وبشرف علي العلاج فيها في نفس المستشفي في بريطانيا

انا من الاطباء. النفسيين البؤمنوا بالتداوي البعتمد علي العلاج بالصدمات الكهربائية … ولي سنوات مسؤولة عن العيادة حقت يوم الجمعة ومعاي طاقم كامل من استشااري التخدير المتخصصين في العلاج بالكهرباء والممرضات والممرضين التم تجهيزهم عشان يقدروا يساعدوا في النوع دا من التداوي …

ومااي طبيب نفسي بعالج بالكهرباء الا اذا تم تاهيله تماما للنوع دا من اساليب التداوي وحصل علي فترة تدريبية. محددة. وتم تمرينه بواسطة دكاترة نفسيين عندهم خبرتهم الكافية .. وقدر يمر بالاختبارات والمطلوبات البتديه الحق في علاج الناس بالكهرباء … وعلي دراية كاملة باللواىح والقوانين والحاحات البتنظم النوع دا من العلاج …

العلاج بالكهرباء يستخدم في حالات معينة من الامراض النفسية …الامراض دي مااستجابت للعلاجات التانية … او نكون عايزين استجابة سريعة للمريض للخطر الواقع عليه او علي محيطه نتيجة للمرض النفسي مثلا في حالات الاكتئاب الشديد المصحوب بافكار انتحارية …
.
الهوس الشديد في اضطراب ثنائي القطب.

الفصام (خاصة الحالات التي يصعب علاجها بالأدوية).

الكاتاتونيا (حالة من الجمود النفسي والجسدي).

يعني ببساطة العلاج بالكهرباء

ماانتقام ولا عقاب
ولا بتستعمل عشان العيان عمل حاجة فقرروا انهم يدوه كهرباء

كيف الكهرباء بتشتغل …

بتم تمرير تيار كهربائي صغير جدا للمخ لمدة قصيرة جدا لمدة ثوان .. والعلاج بالكهرباء بتم تحت تخدير كامل وجود مادة مرخية للعضلات .. بتحصل نوبة صرع خاضعة لقياس زمن … النوبة دي بتحدث تغييرات في كيمياء الدماغ .. والتغيير دا هو البساعد علي تحسين الحالة النفسية

بتم اعداد المريض جسمانيا للعلاج بالكشف عليه والتاكد من صحته

السؤال البتبادر لاذهان الناس … هل العلاج دا مؤلم !!!

المريض ببخضع لعملية تخدير كاملة بمادتي البروبوفول وسوكساميثونيوم عشان كدة ما بكون في اي الم …

القصة كلها ما بتاخد اكتر من عشرة دقايق بتخديرها وعلاجها ولحظة افاقة المريض … يعني ما هي شيء بياخد زمن ..

ممكن شخص يكون حريص يعرف التاثيرات الجانبية للعلاج بالكهرباء …
واللهي
فقدان ذاكرة مؤقت (خصوصًا للأحداث القريبة من فترة العلاج).

صداع أو غثيان بعد الجلسة.

ارتباك مؤقت بعد الاستيقاظ.

نادر جدا انو تكون في مضاعفات خطيرة بالذات اذا تم العلاج تخت اشراف طبي متخصص في المسالة دي

الدايرة اقوله الناس العندهم احبابهم مريضين بالاكتئاب وما بقوا كويسين بالرغم من تعاطيهم للعلاج لفترة طويلة ولسه ما بقوا كويسين .. وبالذات البتوقفوا عن الاكل والشراب .. العلاج بالكهرباء هو اكثر علاج امن و
safe

سعادتي انا علي المستوى الشخصي بتحصل وانا بشوف في عيانيني وهم بتغيروا كيف وبسرعة جدا … ولمااشوف ابتسامة واحد منهم بحس بالكون دا كله ضوى …

شفى الله كل مريض والبسهم ثوب العافية

تماضر الحسن
طبيب امراص نفسية